Dritarja e kërkimit

1 ᒨᓯᓯᑦ 1

ᐱᓐᖑᖅᑎᑕᐅᓂᐅᑉ ᐅᓂᒃᑲᐅᓯᐅᓂᖓ

1ᐱᒋᐊᕐᖕᓂᕐᖕᒥ ᒎᑎ ᐱᓐᖑᖅᑎᑦᓯᓚᐅᖅᐳᖅ ᕿᓚᖕᓂᒃ ᓄᓇᖅᔪᐊᕐᖕᒥᒡᓗ. 2ᓄᓇᖅᔪᐊᖅᓕ ᐋᖅᑭᒃᓯᒪᓚᐅᓐᖏᓚᖅ ᓱᓇᑕᖃᕋᓂᓗ, ᐃᑎᔪᖅᔪᐊᒥᒃ ᑖᖅᑐᐊᓘᓪᓗᓂ; ᒎᑎᐅᓪᓗ ᐊᓂᕐᖕᓂᖓ ᐃᖏᕐᕋᓚᐅᖅᐳᖅ ᐃᒫᓘᑉ ᖁᓛᒍᑦ. 3ᒎᑎᓗ ᐅᖃᖅᐳᖅ, “ᖃᐅᒪᔪᖃᖅᓕ” ᖃᐅᒪᔪᒥᒡᓗ ᓴᖅᑭᑦᑐᖃᖅᐳᖅ. 4ᒎᑎᐅᓪᓗ ᖃᐅᒪᔪᖅ ᕿᒥᕐᕈᒐᒥᐅᒃ ᓈᒻᒪᒋᕚ; ᒎᑎᐅᓪᓗ ᖃᐅᒪᔪᖅ ᐊᕕᑎᑉᐹ ᑖᖅᑐᒥᑦ, 5ᒎᑎᐅᓪᓗ ᖃᐅᒪᔪᖅ ᑍᕚ ᐅᓪᓗᒥᒃ, ᑖᖅᑐᖅᓗ ᑍᓪᓗᒍ ᐅᓐᓄᐊᒥᒃ. ᐅᓐᓄᐊᖅᓗ ᐊᓂᒍᕐᖕᒪᑦ ᐅᓪᓛᓐᖑᖅᐳᖅ, ᑕᕝᕙ ᐅᓪᓗᖅ ᓯᕗᓪᓕᖅᐹᖅ.

6ᒎᑎᓗ ᐅᖃᕆᕗᖅ, “ᐃᒪᖅ ᖁᓕᒥᐅᑕᖅᑖᖅᓕ ᐊᐅᓚᖏᑦᑐᒥᒃ ᐃᒪᐅᑉ ᕿᑎᖓᓂ, ᐊᕕᒃᓯᓗᓂ ᐃᒪᕐᖕᒥᒃ ᐃᒪᕐᖕᓂᒡᓗ.” 7ᒎᑎᓗ ᑕᕝᕙ ᓴᓇᕗᖅ ᐊᐅᓚᖏᑦᑐᒥᒃ ᐊᕕᒃᓗᒋᑦ ᐃᒪᖅ ᐊᓪᓕᐅᓕᖅᓗᓂ ᐃᒪᕐᖕᒥᑦ ᖁᓕᕆᔭᒥᓂᑦ ᑍᒤᓕᖓᓕᓚᐅᖅᐳᖅ. 8ᒎᑎᐅᓪᓗ ᖁᓛᓕᐊᓂ ᐊᐅᓚᖏᑦᑐᖅ ᑍᕙ ᕿᓚᖕᒥᒃ. ᐅᓐᓄᐊᖅᓗ ᐊᓂᒍᕐᖕᒪᑦ ᐅᓪᓛᓐᖑᖅᐳᖅ, ᑕᕝᕙ ᐅᓪᓘᑉ ᐂᑉᐸᖓ.

9ᒎᑎᓗ ᐅᖃᕆᕗᖅ, “ᐃᒪᖅᔪᐊᖅ ᕿᓚᐅᑉ ᐊᑖᓂᑦᑐᖅ ᑲᑎᓪᓕ ᐊᑕᐅᓯᕐᖕᒧᑦ, ᓄᓇᓗ ᐸᓂᖅᑐᖅ ᓴᖅᑭᓕᖅᓕ.” ᑍᒤᓕᖅᐳᖅᓗ. 10ᒎᑎᐅᓪᓗ ᐸᓂᖅᑐᖅ ᑍᕚ ᓄᓇᖅᔪᐊᒥᒃ, ᐃᒪᖅ ᐊᑕᐅᓯᕐᖕᒧᑦ ᑲᑎᓯᒪᔪᖅ ᑍᓪᓗᓂᐅᒃ ᐃᒪᖅᔪᐊᕐᖕᒥᒃ. ᒎᑎᐅᓪᓗ ᑕᑯᓪᓗᒋᑦ ᓈᒻᒪᒋᕔᑦ. 11ᐊᒻᒪ ᒎᑎ ᐅᖃᕆᕗᖅ, “ᓄᓇᖅᔪᐊᖅ ᖃᓄᐃᑦᑐᑐᐃᓐᓇᕐᖕᓂᒃ ᐱᕈᖅᑐᖃᖅᓕ, ᐱᕈᖅᑐᓂᒃ ᐱᕈᖅᓯᐊᒃᓴᖃᕈᓐᓇᖅᑐᓂᒃ, ᐸᐅᕐᖓᓕᖕᓂᒡᓗ ᓇᐹᖅᑐᓂᒃ ᐸᐅᕐᖓᖏᓪᓗ ᐱᕈᖅᓯᐊᒃᓴᖃᖅᓗᑎᒃ ᐃᓗᐊᒍᑦ, ᐊᑐᓂᑦ ᖃᓄᐃᑦᑑᓂᑎᒃ ᒪᓕᒡᓗᒋᑦ ᓄᓇᒥ.” ᑍᒤᓕᖅᐳᖅᓗ. 12ᓄᓇᖅᔪᐊᖅᓗ ᐱᕈᖅᑐᖃᓕᖅᐳᖅ, ᐱᕈᖅᑐᑦ ᐊᑦᔨᒥᖕᓂᒃ ᐱᕈᖅᓯᐊᒃᓴᓖᑦ, ᓇᐹᖅᑐᓪᓗ ᐸᐅᕐᖓᓖᑦ ᐱᕈᖅᓯᐊᒃᓴᓖᑦ ᐸᐅᕐᖓᒥᖕᓂᒃ, ᖃᓄᐃᑦᑑᓂᑎᒃ ᒪᓕᒡᓗᒋᑦ. ᒎᑎᐅᓪᓗ ᑕᑯᓪᓗᒋᑦ ᓈᒻᒪᒋᕔᑦ. 13ᐅᓐᓄᐊᖑᓚᐅᖅᓗᓂ ᐅᓪᓛᖑᓕᕆᕗᖅ, ᑕᕝᕙ ᐅᓪᓗᐃᑦ ᐱᖓᔪᐊᑦ.

14ᒎᑎᓗ ᐅᖃᕆᕗᖅ, ᖃᐅᒪᔫᖕᓂᒃ ᓴᖅᑭᑦᑐᖃᖅᓕ ᐊᐅᓚᖏᑦᑐᒥ ᕿᓚᖕᒥ ᐅᓪᓗᖅᓗ ᐅᓐᓄᐊᖅᓗ ᐊᕕᓯᒪᖁᓪᓗᒋᒃ; ᑖᒃᑯᐊ ᓇᓗᓁᒃᑯᑕᐅᓂᐊᕐᖕᒪᑕ ᐅᑭᐅᖃᑦᑕᖅᑐᒧᑦ ᐊᐅᔭᕈᖃᑦᑕᖅᑐᒧᓪᓗ ᐅᓪᓗᓄᑦ ᐊᕐᕌᒍᓄᓪᓗ. 15ᑖᒃᑯᐊᓗ ᖃᐅᒪᔪᒃᓴᐅᓪᓗᑎᒃ ᐊᐅᓚᖏᑦᑐᒥ ᕿᓚᖕᒥ ᓄᓇᖅᔪᐊᕐᖕᒥᒃ ᖃᐅᒪᑎᑦᓯᖁᓪᓗᒋᑦ, ᑍᒤᓕᖅᐳᖅᓗ. 16ᒎᑎᓗ ᒪᕐᕉᖕᓂᒃ ᖃᐅᒪᑎᑦᓯᓂᖅᐹᖕᓂᒃ ᐱᓐᖑᖅᑎᑦᓯᕗᖅ, ᖃᐅᒪᓂᖅᓴᖅ ᐊᐅᓚᑦᓯᖁᓪᓗᒍ ᐅᓪᓗᒃᑯᑦ, ᖃᐅᒪᖏᓐᓂᖅᓴᖅᓗ ᐊᐅᓚᑦᓯᖁᓪᓗᒍ ᐅᓐᓄᐊᒃᑯᑦ; ᐅᓪᓗᕆᐊᓪᓗᑦᑕᐅᖅ ᐱᓐᖑᖅᑎᑉᐰᑦ. 17ᑖᒃᑯᐊᓗ ᒎᑎᐅᑉ ᐊᐅᓚᖏᑦᑐᒥ ᕿᓚᖕᒥ ᐃᓂᖃᖅᑎᑉᐰᑦ ᓄᓇᖅᔪᐊᖅ ᖃᐅᒪᑎᑕᐅᖁᓪᓗᒍ, 18ᖃᐅᒪᓂᖅᐹᖅᑕᖃᖁᓪᓗᒍ ᐅᓪᓗᒃᑯ ᐅᓐᓄᐊᒃᑯᓪᓗ ᑖᖅᑐᐊᓗᒃ ᐊᕕᒡᓗᒍ ᖃᐅᒪᔪᒥᑦ. ᒎᑎᐅᓪᓗ ᑕᑯᓪᓗᒋᑦ ᓈᒻᒪᒋᕔᑦ. 19ᐅᓐᓄᐊᖑᓚᐅᖅᓗᓂ ᐅᓪᓛᖑᓕᕆᕗᖅ, ᑕᕝᕙ ᐅᓪᓗᐃᑦ ᓯᑕᒪᖓᑦ.

20ᒎᑎᓗ ᐅᖃᕆᕗᖅ, “ᐃᒪᖅ ᐃᒪᕐᖕᒥᐅᑕᓂᒃ ᐆᒪᔪᖃᖅᓕ ᐅᓄᖅᑐᖅᔪᐊᓂᒃ, ᓯᓚᓗ ᑎᖕᒥᐊᖃᖅᓕ ᓄᓇᐅᑉ ᖁᓛᒎᑦ ᑎᖏᕙᒃᑐᓂᒃ ᕿᓚᖕᒥ ᐊᐅᓚᖏᑦᑐᒥ.” 21ᑍᒫᒃ ᒎᑎ ᐱᓐᖑᖅᑎᑦᓯᕗᖅ ᐆᒪᔪᐊᓗᖕᓂᒃ ᐊᖏᔪᓂᒃ ᐃᑎᔪᒥᐅᑕᕐᖕᓂᒃ ᐆᒪᔪᓕᒫᓂᒡᓗ ᐃᖏᕐᕋᔪᓐᓇᖅᑐᓂᒃ, ᐃᒪᕐᖕᒥᐅᑕᕐᖕᓂᒃ ᐃᒻᒥᒍᑦ ᐊᑦᔨᒌᖕᓂᖃᖅᑐᓂᒃ ᐅᓄᖅᑐᖅᔪᐊᓂᒃ, ᑎᖕᒥᐊᓂᒡᓗ ᐃᒻᒥᒍᑦ ᐊᑦᔨᒌᖕᓂᖃᖅᑐᓂᒃ ᐅᓄᖅᑐᖅᔪᐊᓂᒃ. ᒎᑎᐅᓪᓗ ᑕᑯᓪᓗᒋᑦ ᓈᒻᒪᒋᕔᑦ. 22ᒎᑎᐅᓪᓗ ᓮᒻᒪᖅᑎᑉᐰᑦ, ᐅᖃᖅᓗᓂ, ᕿᑐᕐᖏᐅᓕᕆᑦᓯ ᐅᓄᖅᓯᓗᓯᓗ ᐃᒪᖅᕕᒃ ᐆᒪᔪᓂᒃ ᑕᑕᓪᓗᒍ, ᑎᖕᒥᐊᓪᓗ ᐅᓄᖅᓯᓕᑦ ᓄᓇᖅᔪᐊᕐᖕᒥ. 23ᐅᓐᓄᐊᖑᓚᐅᖅᓗᓂ ᐅᓪᓛᓐᖑᖅᐳᖅ ᑕᕝᕙ ᐅᓪᓗᑦ ᑕᓪᓕᒪᖓᑦ.

24ᒎᑎᓗ ᐅᖃᕆᕗᖅ, “ᓄᓇᖅᔪᐊᖅ ᐆᒪᔪᖃᖅᓕ ᐃᒻᒥᒍᑦ ᐊᑦᔨᒌᖕᓂᖏᑦ ᒪᓕᒡᓗᒋᑦ; ᐱᓱᒃᑎᓂᒃ ᐹᕐᖑᖅᑐᓂᒡᓗ ᓄᓇᒥ ᓄᔪᐊᖅᑐᓂᒃ ᐃᒻᒥᒍᑦ ᐊᑦᔨᒌᖕᓂᖏᑦ ᒪᓕᒡᓗᒋᑦ.” ᑍᒤᓕᖅᐳᖅᓗ. 25ᒎᑎᐅᓪᓗ ᑕᒪᕐᖕᒥᒃ ᑕᒪᒃᑯᐊ ᐱᓐᖑᖅᑎᑉᐰᑦ ᐆᒪᔪᐃᑦ ᐃᒻᒥᒍᑦ ᐊᑦᔨᒌᖕᓂᖏᑦ ᒪᓕᒡᓗᒋᑦ, ᐹᕐᖑᖅᑐᓪᓗ ᒪᓂᖅᑲᒥ ᐃᒻᒥᒍᑦ ᐊᑦᔨᒌᖕᓂᖏᑦ ᒪᓕᒡᓗᒋᑦ, ᒎᑎᐅᓪᓗ ᑕᑯᓪᓗᒋᑦ ᓈᒻᒪᒋᕔᑦ.

26ᑕᕝᕙ ᒎᑎ ᐅᖃᕆᕗᖅ, “ᒫᓐᓇᓕ ᐃᓄᖕᒥᒃ ᐊᑦᔨᑦᑎᓐᓂᒃ ᓴᓇᓚᐅᖅᑕ, ᐅᕙᑦᑎᓐᓂᒃ ᐊᑦᔨᖃᐸᓗᖕᓂᐊᖅᑐᓂᒃ; ᐊᖓᔪᖅᑲᐅᓂᐊᖅᑐᓂᒃ ᐃᖃᓗᖕᓄᑦ ᐃᒪᕐᖕᒥᐅᑕᓄᓪᓗ, ᑎᖕᒥᐊᓄᓪᓗ ᖃᖓᑕᕙᒃᑐᓄᑦ, ᐆᒪᔪᓕᒫᓄᓪᓗ ᓄᔪᐊᖏᑦᑐᓄᑦ, ᓄᓇᒦᑦᑐᓕᒫᓄᓪᓗ, ᐹᕐᖑᖅᑐᓄᓪᓗ ᑕᒤᓐᓂᒃ ᓄᓇᒥ ᐹᕐᖑᖅᑐᓕᒫᓄᑦ.” 27ᑕᕝᕙ ᒎᑎ ᓴᓇᕗᖅ ᐃᓄᖕᒥᒃ ᐃᒻᒥᑐᑦ ᐊᑦᔨᖃᖅᑎᓪᓗᒍ, ᑕᕝᕙ ᒎᑎ ᐊᑦᔨᒥᓂᒃ ᐃᓄᖕᒥᒃ ᓴᓇᕗᖅ; ᐂᑉᐹ ᐊᖑᑕᐅᓪᓗᒍ ᐂᑉᐹᓗ ᐊᕐᖕᓇᐅᓪᓗᒍ ᓴᓇᕚᒃ. 28ᒎᑎᐅᓪᓗ ᑖᒃᑯᐊᒃ ᓮᒻᒪᖅᑎᑉᐹᒃ, ᐅᖃᐅᑎᓪᓗᒋᒡᓗ, “ᕿᑐᕐᖏᐅᕆᑦᓯᒃ ᐅᓄᖅᑐᖅᔪᐊᓂᒃ ᓄᓇᖅᔪᐊᖅ ᑕᑕᓪᓗᒍ ᐊᐅᓚᓕᖅᓗᒍᓗ; ᐊᖓᔪᖅᑲᐅᕕᒋᓕᖅᓗᒋᑦ ᐃᖃᓗᐃᑦ ᐃᒫᓃᑦᑐᑦ ᑎᖕᒥᐊᓪᓗ ᖃᖓᑕᕙᒃᑐᑦ ᐆᒪᔪᓕᒫᓪᓗ ᓄᓇᒥ ᐊᐅᓚᕙᒃᑐᑦ.” 29ᒎᑎᓗ ᐅᖃᕆᕗᖅ, “ᑕᑯᒋᑦ, ᑐᓂᓯᕕᒋᕙᑦᓯ ᖃᓄᐃᑦᑐᑐᐃᓐᓇᕐᖕᓂᒃ ᐱᕈᖅᑐᓂᒃ ᑕᒤᓐᓂᒃ ᐱᕈᖅᓯᐊᒃᓴᓕᐅᖅᑐᓂᒃ ᓄᓇᖅᔪᐊᕐᖕᒥ, ᓇᐹᖅᑐᓂᒡᓗ ᑕᒤᓐᓂᒃ ᐱᕈᖅᓯᐊᒃᓴᓕᖕᓂᒃ ᐸᐅᕐᖓᒥᖕᓂᒃ; ᑕᒪᒃᑯᓂᖓ ᓂᕿᒃᓴᖃᖁᓪᓗᓯ. 30ᐊᒻᒪᑦᑕᐅᖅ ᐆᒪᔪᓕᒫᑦ ᓄᓇᖅᔪᐊᕐᖕᒥ, ᑎᖕᒥᐊᓕᒫᓪᓗ ᖃᖓᑕᕙᒃᑐᑦ, ᐹᕐᖑᖅᑐᓕᒫᓪᓗ ᓄᓇᒥ, ᐊᓂᖅᑎᕆᔪᓐᓇᖅᑐᓕᒫᑦ ᓄᓇᖅᔪᐊᕐᖕᒥ, ᐱᕈᖅᑐᓕᒫᑦ ᑐᖑᔪᖅᑐᑦ ᓂᕿᒃᓴᐅᖁᓪᓗᒋᑦ ᑐᓂᕙᒃᑲ.” ᑕᒪᓐᓇᓗ ᑍᒤᓕᖅᐳᖅ. 31ᒎᑎᐅᓪᓗ ᐱᓐᖑᖅᑎᑕᓂ ᑕᒪᕐᖕᒥᒃ ᕿᒥᕐᕈᕔᑦ, ᑕᑯᓪᓗᒋᑦ ᓈᒻᒪᒋᒻᒪᕆᒃᐰᑦ. ᐅᓐᓄᐊᖑᓚᐅᖅᓗᓂ ᐅᓪᓛᖑᓕᖅᐳᖅ ᑕᕝᕙ ᐅᓪᓗᑦ ᐱᖓᓲᔪᖅᑐᖓᑦ.

ᐊᒡᓔᑦ ᐃᑦᔪᕐᖕᓁᑦᑐᑦ

Eastern Arctic Inuktitut Bible © 2012 Canadian Bible Society

More Info | Version Index